Saudi Arabiami arnat biileqqusaanngitsut akerliusut

Arnat akerliussutsimik takutitsisut biilerlutik, arnat biileqqusaalernissaannik oqaluutigalutik imminnut videoliareriarlutik internetikkut takusassiarisimavaat.

Majeha al-Huwaider sapiitsupilussuusimassaaq, tassami Saudi Arabiami arnaalluni biilerami, paarnaarussaasinnaavoq, suliffimminit soraarsitaasinnaavoq inuiaqatigiinnullu nittarsaanneqarluni nikanarsagaasinnaavoq. Majeha al-Howaiderip sakiatsiani videoliortuliullugu biilerpoq kingornalu internetsikkut saqqummersillugu, nunarsuarmiut tamarmik inatsisinik unioqqutitsinerminik isiginnaarsinnaanngorlugit. Saudi Arabiamimi, qanganisarsiorfioqisumi upperisarsiorfioqisumilu, inatsisit malillugit arnat biileqqusaanngillat. Naalagaaffimmi palasit isumaqarput arnamut naapertuilluartumut biilerneq tulluartuunngitsoq. Palasit isumaqarput arnat angutinut akulerullutik biilersinnaaleraluarpata, inuiaqatigiit pissuserluffiusut inatsisaatsuliorfiusullu ingerlanneqalissasut.

Howaiderili isumaqarpoq arnat biilersinnaatitaanissaannut apeqqut upperisamut tunngassuteqanngitsoq, inuilli ulluinnarni inuuniarnerminni pisariaqartilersimagaat. Maani angutit arnallu isumaqarput arnat biileqqusaalertariaqartut Saudi Arabiamilu pissutsinut naalakkersuisoq matumuuna qinnuiginiarparput kissaatigineqartoq inatsisitigut akuereqqullugu.

Arnat kingullermik biilertut ukiut 18-it matuma siorna tigusarineqaramik ulloq ataaseq paarnaarussaapput, passiminnik arsaarneqarlutik arlallillu suliffimminnit soraarsitaallutik.

Saudi Arabiami allanngortoqangaarsimanngikkaluartoq Igitsinimioq ilanngutassiortoq, Mona El Tahawi oqarpoq taamatut akerliussutsimik takutitsinerit, inuiaqatigiinnut annguttartut siunissami allanngortiterinermut sunniuteqartupilussuujumaartut.