Air Greenland Angalasut arfininngornermi apuunniarneqarput
![](/sites/default/files/styles/image_934x467/public/article_images/image_19.jpg?itok=ymAVa4W5)
Timmisartuutileqatigiiffik timmisartunik angallassinermi killiffiusoq pillugu taama allappoq.
Silassamik ilimasaarummi naqitsiniisaffik sakkortuumik naqitsinilik nunatta sineriaanut illuariartorpoq, timmisartukkullu angallassinermut sapaatip tungaanut sunniuteqassalluni.
Silassamik ilimasaarut eqquutissappat, timmisartuussinerit ataasinngornermi ullaakkut aatsaat nanginneqarsinnaassapput.
Taamaattumik timmisartuuleqatigiiffik Air Greenland naqitsiniisaffiup arfininngornermi kitaanut anngunnissaa sioqqullugu, timmisartumut ilaasussat apuuffissaannut timmisartuuniarlugit ulapippoq.
Timmisartorsuaq ullumikkut Københavniliartussaq kinguartinneqarpoq unnugu aqqanermut qiteqquppat tassalu 22:30 aallartussanngorlugu, taamaalillutik sinerissamit ilaasussaat teknikertoqarnerani kinguaattoortut ilaasinnaaniassammata.
Timmisartunut ilaasussat timmisartuutileqatigiiffiup Air Greenlandip nittartagaatigut malinnaasinnaapput.
Angalanissamut inniminniinermi mail adressit aamma mobil normut tunniussimagaani angalanissamut pilersaarutit nutaat nassiunneqassapput.
Angalanissanut paasissutissat nutaat pillugit timmisartuutileqatigiiffiup Air Greenlandip oqarasuaatikkut atuisunut kiffartuussivianut 70 12 12-mut sianerluni paasineqarsinnaapput.