SASip ingerlaannarnissaa ilimanarsisoq

SAS-illi qullersaata Rikard Gustafsonip oqaatigaa, sipaarniarfissatut pilersaarutit iluatsissappata, Danmarkimi timmisartuni saqisut kattuffiannik CAU-mik isumaqatigiissuteqarnissaq pingaarutilerujussuusoq.

- Aamma tamanna angussaqqaarparput, SAS-ip qullersaa nalunaaquttap akunnerata ataatsip matuma siornatigut oqarpoq.

SAS-ip qullersaqarfiata aamma Danmarkimi, Norgemi Sverigemilu timmisartortartut isumaqatigiinniarnertik ullaaq maanna iluatsippaat.

Timmisartortartut SAS-imik isumaqatigiissuteqarnermikkut akissarsiaat ikileriassapput sulinerusalissallutillu.

Norgemi timmisartuni saqisut peqatigiiffiisa marluusut aappaat SNK, SAS-ip qullersaqarfianik unnuaq aamma isumaqatigiissuteqarpoq.

Sverigemi timmisartuni saqisut sipaarniutissatut pilersaarutit akuersaarlugit aamma unnuaq nalunaarutigaat.

SAS pisariaqartilluinnakkaminik aningaaserivinnit aamma Danmarkip, Sverigep Norgellu naalagaaffiinit aningaasaliiffigineqarsinnaassaguni, sipaarniutissatut pilersaarutit annertuut piumasaqataasaasut naammassiniartussaavai.

Sipaarniutigineqartussat katillugit 5,2 milliardit koruuniupput, taakkunannga 2,6 milliardit koruunit aningaasartuutinik ikilisaanikkut pissallutik. Sinneruttut SAS-ip suliffeqarfiutaannik tunisinikkut anguneqassallutik, ilaatigut tunineqartussat tassaallutik SAS Ground Handling aamma Norgemi timmisartuutileqatigiiffik Widerøe.

Timmisartuutileqatigiiffik maanna 15.000-inik sulisoqarpoq, sipaarniarnikkullu sulisut 9.000-inut ikileriarnissaat anguniarneqarluni. Taakkunannga ilaatigut allaffeqarfinni atorfiit 800-t atorunnaarsinniarneqarput.