Ateq: Sascha Blidorf
Partii: Demokraatit
Ukiut: 18-it
Ilinniagaq/suliffik: Illinniarnertuunngorniarfimmi ukiup aappassaa ilinniartoq, Café Toqqorfimmi sulisarpoq
Inuttut inissisimaffik(ilaquttat/meeqqat: Katinnikuunngilanga meeraqarnangalu
Sunngiffimmi soqutigisat: Kammalaatikka ilaquttakkalu uannut isumalerujussuupput, taamaammat piffissangaatsiaq taakkununnga atortarpara. Silap pissusianut avatangiisinullu tunngassuteqartunik soqutigisalerujussuuvunga - tassungalu tunngasunut piffissamik atuingaatsiartarlunga.
Folketingimut qinigaassaguit pingaarnertut sulissutigerusutatit pingasut suuppat?
Pingaarnertut silap pissusia avatangiisillu sulissutigerusuppakka. Ilisimaarilluarpara qulequttat tassunga tunngassuteqartut akisussaaffiit angerlaanneqarnikuusut - taamaattorli naalagaaffeqatigiinnermi akisussaqqaatigiittariaqarpugut, qularinngilarali suleqatigiilluarsinnaalluta.
Aappaattut uagut inuusuttut naalagaaffeqatigiinnermi suleqatigiissinnaanerup ataqqinnissuseqartumik suleqatigiissinnaanissaat qulakkeersuppara. Nassuerutigisariaqarpara ullumikkut immitsinnut eqqartuleraangatta najummatsertarpunga. Danskit kalaallit pillugit oqaasii kusanarpallaarneq ajorput, illuatungaanilu kalaallit aamma danskit pillugit oqaasii kusanarpallaarneq ajorput. Ataqqeqatigiissiinnaaneq amigaataavoq - pissuseq taanna aallanngortikkusuppara.
Pingajuattut nunatsinniit Danmarkimut ilinniariartartut faginut assigiinngitsunut tunngatillugu Danmarkimi ilinniarfiit suleqatiginerusariaqarpaat, nunatsinnut inuussutissarsiornermut iluaqutaanerulersillugit. Ilinniarlutillu naammassigaangamik nunatsinnullu angerlarlutik nunatsinnut iluaqutaasumik inuussutissarsiornikkut siuarsaaqataasinnaanissaat pingajuattut qineqqusaarutigaara.
Kalaallit Danmarkimi najugaqartut pitsaasumik inuuneqarnissaat qanoq ilillutit qulakkeerinneqataaffigisinnaaviuk?
Siullermik oqarusuppunga, Danmarkimi najugaqarnissaq aalajangiussimagaanni taava danskisuulli allatut innuttaalernissaq naatsorsuutigineqartariaqarpoq. Taamaammat Danmarkimut nunasisimagaanni allatut pineqarnissaq naatsorsuutigineqartarnera paasiuminaatsippara. Ilinniariartorlunili Danmarkimiikkaani allaaneruvoq, isumaqarpunga ilinniarneq eqqarsaatigalugu nunarput Danmarkilu ataqatigiinnerat pitsaanerusariaqartoq inuussutissarsiornikkut inuuniarneq eqqarsaatigalugu. Inuusuttullu ilinniartut nunatsinnut uteqqinnissaat nakkutiginissaat pingaaruteqarsoraara.
Folketingimut qinigaassaguit statministerissatut sorleq tapersersussaviuk?
Statsministerissamik toqqaanissamut uagut akuliukkusunngilagut. Tamanna danskit qinersisartuisa aalajangerumaarpaat - uannut pingaarnerpaavoq nunatta Folketingimut oqariartuutai tusarneqartarnissaat.