Aasaanerani Københavnip Kangerlussuullu akornanni sapaatip akunneranut pingasoriarluni timmisartuussisalernissaq SAS-imit piareersarneqarpoq.
Aasakkut timmisartuussineq maajimiit septembarimut ingerlanniarneqartoq Sermitsiami aqagu saqqummersussami allaaserineqarpoq.
Ineqarnermut attaveqarnermullu pisortaqarfimmi immikkoortortami pisortap, Michael Pedersenip uppernarsarpaa SAS-ip timmisartuussisinnaanermut qinnuteqaataa suliarineqaleruttormat.
- SAS-ip qinnuteqaataa suliarileruttorparput. Naatsorsuutigaara qaammatip uuma naalernerani naalakkersuisunut innersuussuteqarsinnaassalluta. Tamatuma kingorna naalakkersuisut aalajangiisinnaalissapput, Michael Pedersen Sermitsiamut oqarpoq.
Air Greenlandimi pisortaaneq Flemming Knudsen oqarpoq unammillerneqarnissaminnut piareersimallutik.
- Tamanna piareersimaffigaarput, maannali Air Greenlandimut qanoq kinguneqassanersoq oqaaseqarfigisinnaanngilara. Qanoq sunniuteqarsinnaaneranut ilaasut amerleriaataat apeqqutaassapput, Flemming Knudsen oqarpoq aamma taassuma SAS-imit unammillerneqarnerup kinguneranik bilitsit akiisa allanngornissaat ilimaginngilaa.
Takornariaqarnermik suliaqartunit nunatta Danmarkillu akornanni timmisartuussinermik SAS-ip periarfissarsiornera nuannaarutigineqarpoq.