SAS kingumut nunatsinnut
Kalaallit Nunaannut timmisartuussinermik nutaamik SAS-ip aallartitsiniarnera maanna akuerineqarpoq.
Taamaalilluni SAS maajip qaammataa aallarnerfigalugu sapaatip akunneranut marloriarluni Kangerlussualiartalissaaq.
SAS 2002-mi kingullermik nunatsinnut nunatsinniillu timmisartuussivoq.
Maajimi sapaatip akunneranut marloriartassaaq, piffissami angallaffiunerpaami, tassa juunimi, juulimi aggustimi septembarimilu sapaatip akunneranut pingasoriartassalluni.
- Sullitavut Kalaallit Nunaannut angalanissaannik kingumut neqeroorfigisinnaaleratsigik nuannaarutigeqaarput, Air Greenlandillu suleqatigilernissaa qilanaareqalutigu, issimasuttami Kalaallit Nunaanni ornitassaminnut ingerlaqqinnissaat Air Greenlandip isumagisartussaavaa, Scandinavian Airlinesimi pisortaaneq, Susanne Larsen, oqarpoq.
SAS siornatigut ukioq tamaat Kalaallit Nunaannut timmisartuussisarpoq, Boeing 767 220-nik issimasoqarsinnaasoq atorlugu imarpik qulaallugu angalasarluni, timmisartorsuarli taanna atussallugu akilersinnaajunnaarmat, tamanna 2002-mi unippoq.
