SAS-imi saqisut suli suliumajunnaarput

SAS-imi suliumajunnaarneq suli atuuppoq. Timmisartuussinissaraluit 100-t ullaaq manna taamaatiinnarneqarput, sulilu amerlanerit taamaatiinnarneqarnissaat ilimagineqarsinnaasoq,

Jens Langergaard, SAS-p Danmarkimi immikkoortortaani tusagassiisartoq, nalunaarpoq.

-Ullaaq manna suliumajunnaarnerup, isumaqatigiissutit malillugit unioqqutitsisuusup, assorsuaq kipiluttunartorsiortippaatigut. Københavnimiit aallartussat 42-t unitsiinnarneqarput, Københavnimullu ullaap tunngaani tikittussat 59-it aamma taamaatiinnarneqarlutik. Ilaasussat aallariartunnginnerminni internetikkut nittartakkamut paasiniaaqqaarnissaat siunnersuutigaarput, tusagassiisartoq Jens Langergaard oqarpoq.

Ilaasussaagaluit 500-t tikillugit amerlatigisut mittarfimmi eqqaanilu unnuisariaqarsimapput, SAS-ip ilaasussat tamaasa hotelimi inissaarussimammagit.

Timmisartumi inuttat, saqisut, tassa stewardessit suliumajunnaarnerat SAS-ip timmisartuussinissaraluinik 113-inik ippassaq taamaatiinnartitsivoq.

Stewardessit isumaqatigiissummik nutarteriniarnertik iluatsinngimmat isumaqatigiissutit unioqqutillugit ippassaq ualikkut suliumajunnaarput.

Ullaap tungaani qulinut naapeqqissapput suliumajunnaarneq ingerlatiinnarneqassanersoq aalajangerniarlugu. Stewardessit kattuffianni siulittaasup, Verner Lundtoftip, ilaasortani suliartornissaannik innersuukkaluarpai, aammali taassuma nalunaarutigisareersimavaa isumaqatigiissuteqartoqanngippat suliartortoqarnavianngitsoq.