Timmisartortitseqatigiiffiup SAS-ip aappaagu nunatsinnut timmisartuussisarnissap Akuerineqarnissaa qinnuteqaatigaa.
Siunissaq ungasinnerusoq eqqarsaatigalugu pilersaarusiorneruvoq, tuniniaanerlu ilorraap tungaanut sammivoq. Taamaattumik 2008-mi
timmisartuussisarnissarput qinnuteqaatigaarput, Mikkel Løndahl SAS-imi tusagassiisarnermut siunnersorti aviismut AG oqarpoq. Timmisartortitseqatigiiffik SAS ukiuni tallimani timmisartuussisanngereerluni
maajip ulluisa arfineq aappaanni nunatsinnut timmisartuussisaqqilerpoq. Aasaanerani sap. akunneranut pingasoriarluni timmisartuussisoqartassaaq.
Qaammammi siullermi ilaasut qanoq amerlatigisut timmisartuunneqarsimanersut SAS-ip oqaluttuariumanngilaa, inniminniisimasut qanoq amerlatiginersut ilanngullugu.
Ilaasut qanoq amerlatiginerat niuernermi isertuussassatut isumaqarfigineqarpoq.
Taamaattorli SAS nunatsinnut timmisartuussisarnini ingerlatiinnarniarpaa, ukiaru septemberip ulluisa 28-ata tungaanut.