Sarkozy Libyaliarpoq
Nunami tassani kisermaassilluni naalakkersuisoq, Gaddafi, tukkusaarfigineqarsimaqaaq, EU-mullu qanittumik siunissami attaveqarnissaanik neriorsorneqarsimalluni.
Isumaqatigiissut, bulgariamiut peqqissaasut tallimat palæstinamiullu nakorsap, ukiuni arfineq pingasuni Libyami parnaarussaanerannit aniguisitaanerannik kingunilik, EU-mi politikerinit qulliunerusunit nersualaarneqaqaaq. Taamaallaat naammagittaalliortut tassaallutik atorfillit EU-p nunanut allanut attaveqarneranik suliaqartut, taakkumi isumaqarput Frankrigimi præsidentertaap nulia Cecilie Sarkozy suliamut iluatsittumik ikiuunnermigut akuliunniarpallaarsimasoq, taamalu atorfilittat qaqqaqqalaarnatik suliaasa inernerat maanna kisimiilluni ataqqinaatigileraa.
Frankrigip præsidentiata Sarkozy-p, isumaqatigiissutip ilaa piviusunngortillugu, Libyap kisermaassilluni naalakkersuisua, qanorluunniit periarsinnaasartoq, oberst Gaddafi, ullumi kingusinnerusukkut ulloqeqqasioqatigissavaa, niuernermut naalakkersuinermullu tunngasunik oqaloqatigiitigalugu. Ilaatigut oqaloqatigiissutigineqassapput Libyami inuiaqatigiit aaqqissuussaanerannut Frankrigip aningaasaliissutai, atomip nukinganik nukissiuuteqarneq, uulia pillugu isumaqatigiissutit kiisalu afrikamiut imaq Akullersuaq aqqusaarlugu Europamut isaasut killilersimaarneqarnissaat.
Libya apeqqutinik pingaarutilinnik nassuerutissaqarpoq. Nunat Europap kangianiittut maanna EU-mut ilaasortaalersut akiitsui Libyap isumakkeerinnissutigisariaqarpai, libyamiut ilinniagaqartut hunnorujulikkaat Europami akeqanngitsumik ilinniagaqassapput, taakkua libyamiullu allat Europami nunanut isersinnaanerminnik akuerineqassapput.
Aammattaaq ilaqutariit 438-usut, tassa taakkua meeraat hiv-mik tunillanneqarsimasut, taarsiissutitut checkissatik tamarmik immikkut 6 millioni koruuninik imaqartut tigooraleruttorpaat.
Gaddafip siornatigut oqaatiginikuuaa amerikamiut israelimiullu peqatigiipilullutik peqqissaasut piaaralutik meeqqanik tunillaassuitissimagaat, Libya qajannarsitinniarlugu. Kisianni tassa Gaddafip toqumut pillagassanngortitsinini qanittukkut atorunnaarsippaa.
Peqqissaasut maanna Bulgariamut angerlareerput, kisianni ukiuni arfineq pingasuni tigusaaqqanerminni paarsisuminnit atornerlunneqarlutillu pinngitsaalillugit arneriffigineqartarput. Pinngitsaalisaallutillu unnerluussinerit atsiorsimallugit. Peqqissaasut taakkua taarsiiffigineqarnissaat suli ataasiarluniluunniit maanna taaneqanngilaq.
