Sarkozy Frankrigimi præsidentinngortussanngorpoq

Nicolas Sarkozy Frankrigimi ippassaq præsidentinngorniunnermi qinersisartut taasinerisa 53 procentii pissarsiarai unammillertaatalu Ségoléne Royal-ip 47 procentii pissarsiaralugit.

Nicolas Sarkozy-p præsidentinngornera ataasinngornerup ullaassaanut franskinit 10.000-ilikkuutaanit persuarsiutigineqaqaaq. Arnarlu erinarsortartoq tusaamasaq; Mireille Mathieu, franskit inuiaassutiminnik erinarsuutaat inunnit 30.000-init ingiorneqarluni atormagu, præsidentinngorlaaq qullilisimavoq. Sarkozy maajip ulluisa 16-ianni præsidentitut ivertinneqassaaq, ilimagineqarpoq UMP-politikeri; Francois Fillon, premierministerissamisut ivertissagaa.

Sarkozy, ajugaanerminut atatillugu oqalugiaammini oqaatigaa; franskinut tamanut præsidentiujumalluni, unammillertiminullu ataqqinninnini paasineqassasoq, Royal-ip qinersisaanut milliuunilinnut aamma ataqqinninnini. Franskit EU-mut suleqataanerulernissaat taakkartugaasa ilagaat, kiisalu silaannaap kissakkiartorneranut atatillugu USA ilungersorluni suleqataanerulertariaqartoq aamma oqaatigalugu.