Sarfaq Ittuk mattussaaqqasoq
Siku anorilu pissutaallutik Sarfaq Ittuk ingerlariaqqissinnaanngikkallarpoq. Silamik ilimasaarut naapertorlugu anori aatsaat sapaatip akunnerata tulliani allamut saqinnissaa ilimasaarutigineqarpoq.
Taamaattoq anori allamut saqissagaluarpat Sarfaq Ittuk sisamanngorpat avannamut ingerlaqqissinnaanngussaaq, tallimanngorpallu Nuummit avannamut ingerlaaqqissinnaassalluni, Arctic Umiaq Line A/S-imi pisortaq oqarpoq. Sarfaq tallimanngorpat Nuummit aallarsinnaassappat kinguaattoorneq malinnaaffigineqarsinnaalissaaq, Sarfaq Ittuk Sisimiuni arfininngornermi sapaammilu unnuisarmat. Tamannali pisinnaanngippat ataasinngorpat pisussatut pilersaarutigineqarpoq.
Sillimaniarnikkut pisut qanimut malinnaavigineqarput ilaatigut Issittumi sakkutooqarfik Royal Arctic Linelu qanimut suleqatigalugit.
Ilaasut ajunngillat
Ilaasut naammagittarlutik utaqqisariaqarsimapput, ilaasullu tamarmik ajunngitsut Arctic Umiaq Line nalunaarpoq. Umiarsuarmilu utaqqineq atorluarneqarpoq ilaasummi imminnut aliikkusersoqatigiittarput.
Sisimiuniit kujammut ilaasussaagaluit attavigineqassapput, paasissutissallu Arctic Umiaq Linep Facebookikkut quppernerani malinnaavigineqarsinnaasut, Arctic Umiaq Linemi pisortaq, Aviâja Lyberth Lennert oqarpoq.
Inuit billitsimik pisisimasut ilaanngitsoortullu billitsitik utertissinnaassavaat.