Sarfaq Ittuk imaaneeqqilerpoq
Arctic Umiaq Line-nip pisortaata, Jette Larsenip oqaatigaa, Sarfaq Ittuup misiligarneqarnera ajussanngippat, marlunngorpat ullaakkut qulingiluanut kujammut sinersorluni aallassasoq.
Sarfaq Ittuup misiligarneqarnera iluatsissasoq Jette Larsenip neriuutigalugu Radioaviisimut oqaatigaa, Imarsiornermullu Nakkutilliisoqarfiup umiarsuup isumannannginnera qulakkeeriarpagu, umiarsuup sinersoqqilernissaa oqaatigalugu.
Sarfaq Ittuk oktobarip aqqaneq aappaanili ikkarlimmat sinersorunnaarsinneqarpoq.
Umiarsuaq Qaqortup umiarsualiviata paavatunginnguani ikkarleqqaarmat, qanoq ajoqusersimatiginersoq misissorneqassammat, Nuup amutsivianut qaqeriarneqaraluarpoq qaqitsisarfikkulli sisoorneratigut, amutsiviup avatinnguani ikkarlummut majorallappoq aquutaalu ajoquserluni.
- Umiarsuup ajoquserneri tamarmik maanna iluarsaanneqarsimalerput, Sarfaq Ittuk nutaavimmik aquutitaarpoq, teknikkikkullu tunngasumerngit kingulliit iluarsineqareerpata umiarsuaq tamarmi eqqiarneqassaaq, tassalu sinersuleqqinnissaminut piariissalluni, Jette Larsen KNR-imut oqarpoq.
Sarfaq Ittuup piffissap sivikitsup iluani ajutooqattaarnera, qanoq akeqassanersoq suli ilisimaneqanngilaq, Jette Larsenili oqarpoq akikitsuinnaanavianngitsoq, suliffeqarfiillu umiarsuarmut attuumassutillit tamarmik tamanna isummerfigisariaqassagaat oqaatigalugu.
