Sarah Palin unnuaru oqalugiassaaq
Sarah Palin isertuussaqartarsimagunarmat pissangassutigineqarpoq, unnuaruli oqalugiarnermini imminut illersorpalaarnissaa ilimagineqanngilaq.
Sarah Palinip isornartorsiutigineqareersut akissuteqarfigeriarlugit USA-mi maannakkut ajornartorsiutaasut oqallisigineqartut tassa; aningaasaqarniarneq, peqqarniisaarnianik akiuiniarneq Irakimilu sorsunneq allallu pingaarutillit eqqartussagai ilimagineqarpoq, tassuuna takutinniarlugu sinniisussatut ajukkunnarani naalagaaffiullu ajornartorsiutai nalunnginnamigit qanoq iliuuseqarfigerusussinnaanerlugit oqaatigalugu. Naalagaaffik sinnerlugu isummersorsinnaanini takutinniassavaa, maannakullu nammineq ulluinnarni inuunerminut tunngasut qulaajarneqarnerisa suliassaminut sunniuteqartariaqannginneri suliassaminullu nukissaqarluarnini takutinniassavai.
Ataatsimeersuaqataasut kisimik pissangassanngillat TV-kulli isiginnaartorpassuit aamma naliliiniaqataassapput. Demokratit soorunami oqalussapput McCain sinniisussarsiorami paasiniaavallaarsimanngitsoq, naammattumillu misilittagaqanngitsumik toqqaasimasoq, taammaammallu McCain præsidentinngoreerluni napparsimalissagaluarpat Sarah Palinip præsidentitut nukissaqarsinnaanera akisussaaffilimmillu naalagaaffimmik aqutsisinnaanera apeqquserniassavaat. Republikanerilli talerperliit, kristumiutut pingaartitaat assigiinngitsut Sarah Palinip qangali sulissutigisimammagit taakkunannga qujagineqaqaaq. Taakkorpiaappullu McCainip nammineq imminut tapersersuisinniarlugit naalliuutiginikuusai Republikanerillu ikinngitsut kristumiussutsiminnik pingaartitsisuupput, soorlu naartuersittarnermut akerliusut. Kiisalu puigorneqassanngilaq Sarah Palinip præsidentimut sinniisussatut tallimanngormat suaarutigineqarnerata kingorna McCain qineqqusaarnerminut 10 milliuuni dollarsinik taperneqareermat. Tamakkua qiviaraanni McCain sinniisussaminik toqqaalluarsimasorinarpoq.
