Sarah Palin tv-kkut aallakaatitsisalissaaq

TV-kkut nangeqattaartumik aallakaatittaligassaq qulequtaqarpoq "Sarah Palins Alaska" - guvernøriusimasullu Alaskami pinngortitaq takornariallu nuannarisinnaasaat isiginnaartunut takutinniarpai. Sarah Palinip ilaqutai aallakaatitani aamma peqataassasut, USA-mi tusagassiorfiit arlallit allaaseraat.

Sarah Palin Alaskami guvernøriunermi nalaani saqqumilaartuunngilaq, republikanerit sinnerlugit præsidentip tullersortaatut 2008-mi qinigassanngortikkami aatsaat saqqumilaalerluni.

TV-kkoortarnerpassuamini - ilaatigut TV-mi konservativiusumi Fox Newsimi politikkikkut oqaaseqartartutut - Palinip takutippaa isiginnaartunit nuannarineqarluni.

Nutaarsiassaqartitsivimmi Reutersimi allaaserisat naapertorlugit Sarah Palinip TV-kkut aallakaatitassai Discovery Communicationip 1,2 millionit dollarsinik tamaasa immikkut akilerniarpai.