Sara Olsvig: Aleqap Inatsisartut suleriaasiat ataqqinngilaa

Politikkikkut oqalliffik Arctic Circle Islandip illoqarfiisa pingaarnersaanni Reykjavikimi ullumi ammarneqarpoq, Naalakkersuisullu siulittaasuat Aleqa Hammond ammaanersiornermi oqalugiartunut ilaalluni. Nunatta uranitalinnik annissuilersinnaanissaa pillugu Inatsisartut oktobarip ulluisa 24-anni aalajangiisussaanerat Aleqa Hammondip oqaatigaa, taamatulli oqarnera Inatsisartut suleriaasiannik ataqqinninnginnerusoq, Inuit Ataqatigiit sinnerlugit Inatsisartunut ilaasortap Sara Olsvigip oqaatigaa.
Allattoq Mads Lynge
oktobarip 12-at 2013 16:02

- Aleqa Hammondip taama erseqqitsigisumik Islandimi nalunaarutigisinnaagaa uanga assut eqqumiigivara, tassami uagut maani Inatsisartuni sisamanngormat apersoqattaaraluarpugut partiimut Siumumut Atassutikkunnullu, taavalu aamma Naalakkersuisunut oqallinnermut peqataasunut, attueqqusinngilluinnarnerup peerneqarnissaa qanorpiaq siunertaqarnersoq, tassanilu erseqqissumik akiumaneq ajorput, Inuit Ataqatigiit sinnerlugit Inatsisartunut ilaasortaq Sara Olsvig oqarpoq.

Uranimut naaggaarluinnarnerup atorunnaarsinneqarnissaanut Naalakkersuisut siunnersuutaata Inatsisartuni suliarineqarnera suli naammassineqarsimannginnera, Sara Olsvigip innersuussutigaa, uranimullu tunngasunik taama ersaritsigisumik Nunatsinnit avammut nalunaartoqarsinnaanera eqqarsarnartoqartillugu:

- Piviusoq tassaavoq sisamanngormat Inatsisartuni suliarineqarmat ataatsimiititaliamut ingerlateqqinneqarpoq. Ataatsimiititaliallu aalajangissavaa siunnersuut massakkut qanoq isikkoqassanersoq. Imaassinnaavoq allanngortinneqartoq, imaassinnaavoq kinguartinneqartoq, imaassinnaavoq imarisai qanorpaiarlu isikkoqassanersoq iliuuseqarfigineqartoq. Taamaattumik nunat tamalaat akornanni Islandimi, aamma tusagassiortut nunat tamalaat akornanneersut peqataaffigisaanni taamatut nalunaaruteqarneq assut eqqumiigivara, aammalu isumaqarpunga Naalakkersuisut siulittaasuata takutikkaa Inatsisartuni suleriaaseq Inatsisartullu oqartussaassusaat uani ataqqinngikkaa, Sara Olsvig oqarpoq.

Kalaallit Nunaata nunat uranimik tunisassiortut annerit tallimat akornanniilersinnaanerannik Naalakkersuisut siulittaasuata aamma oqarnera, Sara Olsvigip apeqquserpaa, Naalakkersuisoqatigiillu iluminni assigiinngitsunik oqariartuuteqartarnerat aamma apeqquserlugu:

- Partii Inuit Siumukkullu ilaasortaatitaasa arlallit oqartaqattaartarput "uranisiornianngilagut", taamaattumik Naalakkersuisut siulittaasuata uranimik avammut annissuisoqalernissaanut Islandimi taama erseqqitsigisumik oqalunnera assut tupaallussutigaara, apererusuppungalu Partii Inuit Siumullu ilaasortaatitai qanoq taava isumaqarpat? Inuit Ataqatigiit sinnerlugit Inatsisartunut ilaasortaq Sara Olsvig taama aperivoq.

Naalakkersuisut siulittaasuat Aleqa Hammond oqaaseqartinniaraluaratsigu iluatsinngilarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk