Saqqaq kulturip nalaani mersullaqqissuusimasut
Mersukkamik Saqqaq kulturimeersumik aatsaat nassaartoqarpoq.
Nassaarineqartumi takuneqarsinnaavoq, alerseq ilaartorlugu pussukumiarnarsinnaasumik mersoqqissaarneqarsimasoq. Imalu suliaalluagaatigivoq allaat issittumi atugassatut naleqqussagaalluni.
- Naak alerseq ukiut 4.000-ini nunamiinnermini nungullarsimagaluartoq mersoriaaseq atorneqarsimasoq torralataalluinnarpoq, itsarnisarsiooq Bjarne Grønnow videnskab.dk-mut oqarpoq.
Bjarne Grønnow nunami qeriuaannartumi itsarsuarnitsanik misissuinermut tunngasoq pillugu doktorinngorniuteqaqqammerpoq, tassanilu saqqaq kulturip nalaani kitaani inoqarfiusimasut marluk pillugit allaaserisaqarsimalluni.
Amimerngit kilutallit allanngorsimanngingajattut takutippaat, mersullaqqinnerpaanit suliarineqarsimasut.
Uumasut ujaluinik mersorneq ajornaatsuinnaanngilaq, taakkuli torrallalluinnarlugit assassorneqarsimapput.
Meqqutit uumasup saarniginit sanaajusut aamma nassaarineqarsimasut, Bjarne Grønnow oqaluttuarpoq, nangillunilu oqaatigaa, Canadamit inuit Kalaallit Nunaannut ikaaqqaartut ukiut 4000-t matuma siorna kusanarluinnartunik atisaliortarsimassasut.
