Sapinngisarput naapertorlugu iliuuseqarpugut
Kattuffimminnit sumiginnagaallutik misigisimapput, Namminersorlutillu Oqartussanik isornartorsiunermik tamanna kinguneqarpoq. Maannalu aningaasaqarnermut naalakkersuisoq akissuteqarpoq, taanna akuersaanngilaq paasinnillunili.
Aatsitassanut Ikummatissanullu Pisortaqarfimmi sulisut danskit arfinillit katuffimminnut, Djøf-imut, ikiorneqarnissaminnik ippassaq ujartuipput. Akissarsiamik pisissutaasinnaanerisa ikilineqarnerat Namminersorlutik Oqartussani sulisut maalaarutigaat, tamannalu piffissaq eqqorlugu isumaqatigiissummik isumaqatigiissuteqartoqartannginerata kingunerigaa namminneq isumaqarput. Siunertaasinnaanngilaq, sulisut taakku arfinillit oqarput, issuaaneq aallartippoq: "Namminersorlutik oqartussani aalajangiisartut piginnaasakinnerat, Royal Greenlandimut Greenland Venturemut allanullu suliffeqarfinnut amigartoorutilinnut asuli aningaasanik tunioraasinnaappata, uagut akiliussagipput." issuaaneq naavoq.
Aningaasaqarnermut naalakkersuisup Palle Christiansenip isornartorsiunerup sakkortuup tamanut ammasumik atuartartut allagaattut Nordjyske Stifttidenikkut saqqummiunneqarnera ajorinngilaa, akissarsialli appasinnerisa suliffeqarfinnillu, namminersorlutik oqartussat pigisaannik, aningaasatigut annaassiniarsimanerup imminut attuumassuteqarnera ilumuunnginnerarpaa.
- Inuit piumasaminnik isornartorsiuisinnaapput, aamma tamanut ammasumik isornartorsiuinertik saqqummiussinnaavaat, taakkuli marluk imminnut atuumatitaat, Royal Greenland inuillu ilaat arlaannik amigaateqartut, taakku marluk imminnut attuumassuteqanngilluinnarput. Palle Christiansen oqarpoq.
Namminersorlutik Oqartussani sulisut, inissaqarniarnertik atuartartut allagaanni isornartorsiorpaat, isornartorsiuinerlu taanna aningaasaqarnermut naalakkersuisup maluginiarsimavaa oqaaseqarfigalugulu:
- DJØFimi ilaasortat danskit aviisianni inissaqarniarnerup ajornera isornartorsiorsimagaat paasivara. Tamannalumi nalunngilarput. Sapinngisarpullu tamaat atorlugu sulisut inissaannik sanaartortitsivugut, utaqqiisigalugulu inissiat pissarsiassaasut tamaasa pissarsiariniartarpagut.
Atuartartut allagaanni Namminersorlutik Oqartussani sulisut assersuusiorput, sulisut nutaat sisamat inissiami tallimanik initalimmi initaarnissaminnik utaqqillutik ukiumi ataatsimi ataatsimut inissinneqarsimasut. Allattullu kattuffitsik nipaatsumik tamakkuninnga akuersaaginnarnera akuerisinnaannginnerarpaat.
Aningaasaqarnermut naalakkersuisup Palle Christiansenip pakatsisimaneq paasisinnaavaa, utaqqiisigaluguli inissiat ulikkaaqqasut suliffimmullu atatillugu inissianik utaqqisarnermut nassuiaatigaa 2010imi ukiup affaani siullermi sulisut nutaat 165it atorfinitsinneqarsimasut taassumalu nalaani suliffimmut atatillugu inissianut nuutsitsisarnerit ilimagisamik arriinnerusumik ingerlasimasut.
- Inuit inissianut utaqqisutut allattukkagut amerliartuinnavitsillugit inissiaatigullu taama amerlatiginatik taava soorunami utaqqisoqalissaaq. Tamannalu pitsaanerpaajunngitsoq nalunngilarput, aaqqiissuteqarniarlutalu suliuarpugut. Palle Christiansen oqarpoq.
Atuartartut allagaannik allattut isornartorsiuinertik oqaaseqarfigeqqikkusunngilaat, erseqqissaassutigaalli suliffitsik nuannaralugu, akissarsialli inissaqarniarnerlu kisimik naammaginannginnerarlugit.
Namminersorlutik Oqartussani sulisut, kattuffimminnit DJØFimit sapaatip akunnera naatinnagu nalunaajaat neriorsuutaasimasoq utaqqivaat.
