Sapinngisamik isumaqatigiinnissaq kissaatiginartinneqarpoq
Nunat pisuunerpaat 17-it Londonimi ulluni marlunni ataatsimeereersullu, Danmarkimi silap pissusaanut ministeri Connie Hedegaard ippassaq taama nalunaaruteqarpoq.
Københavnimi ataatsimeersuarnermi tamakkiisumik isumaqatigiittoqarsinnaanissaa ajornakusuussagunartoq, USA-p isumaqatigiinniartartuata Todd Sternip ataatsimiinnerup siuliani oqaatigigaluarpaa, oqarluni tunngaviusumik taamaallaat isumaqatigiittoqassagunartoq.
Tamakkiisumilli isumaqatigiittoqarsinnaanissaa maanna periarfissaalerunartoq, Connie Hedegaardip oqaatigaa.
- Isumaqatigiinniutigineqartussat pingaarnerit isumaqatigiiffiusariaqartut nunat tamalaat maanna paasilerunarpaat, Connie Hedegaard oqarpoq.
Londonimi ataatsimiinneq Major Economies Forum aqqutigalugu ataatsimiinneruvoq, USA-p præsidentiata Barack Obamap ataatsimiittoqarnissaanik kajumissaarineratigut piviusunngortinneqartoq.
