Sapiitsuliortartut Katuamiissapput
Qitittartut misissuataarpaat atortorissaarneq inuttullu inissisimaneq, taakkulu ujartorpaat inuunitsinni suut pingaarnerunersut. Pingaartillugit sammineqarput naleqartitat inuunitsinni tunngavigisagut aammalu siunissaq pillugu sunik eqqarsaateqarnersugut.
- Sapiitsuliortartut takorluuilersitsisarput suullu tamarmik pisinnaanngoriasaartartluik, aamma taakku peqatigalugit piviusut qimakkallarneqarsinnaasarput. Sapiitsuliortut amerlanerit angutaapput. Snik & Snok-ikkulli arnaapput sapiitsuliortartut. Immaqami aamma sapiitsuliortartutut allatut inngikkaluarput. Sapiitsuliortuugaluarput taamaattorli nukerujussuaqarunanngillat nunarsuarmilu pissutsinik aaqqiisaratik. Snik 100 kilometeri isigisinnaavoq Snokilu 100 kilometeri tusaasinnaalluni. Kisianni uatsitulli pasitsajatigaat sukkanatillu nukittuujunngikkaluarlutik. Imaassinnaavormi nuannaartorisassaanngitsulluunnit, qitittartut oqarput.
Katuami nunani avannarlermiunik suleqateqarneq pingaartippaat "Snik & Snok qaammammi"-lu takussutissat ilagiinnarpaat. Qitittartut Norgemiuupput Londonimilu qitinnermik ilinniarsimallutik.
- Una ilaqutariinnut isiginnaagassiaq atorlugu silaannaap allanngornera Nunatsinni malugisarput eqqaasitsissutiginiarparput. Taakkumi meerartatta siunissaat sunnertussaavaat. Neriuppugullu una isiginnaagassiaq atorlugu ajornartorsiut meeqqanut paasiuminarsisinnaallugu. Isiginnaartitsinerup kingorna ilaqutariit ataatsimut eqqartugassaqalerumaarput. Inassutigaarput meeqqat arfineq pingasuleereersimasut isiginnaariassagaat, Katuami aaqqissuinernik ataqatigiissaarisoq Susanne Andreasen oqarpoq.
Isiginnaartitsineq tallimanngorpat juunip arfineq pingajuat nalunaaqutaq 18.30 aallartissaaq.
Isiginnaagassiaq annersumik uani paasisaqarfigineqarsinnaavoq: http://www.katuaq.gl/da/arrangementer/teater_og_dans/teater__danseprogram/snik_snok