Sapaatip akunnerata naanerani Nuummi nipilersortussarpassuit
Ilisimaneqareersutullu nunatsinni aatsaat taama annertutigisumik nipilersornermik tusarnaartitsisoqassaaq, tassami nipilersoqatigiit 20-t missaanniittut sapaatip akunnerata naanerani Nuummi appisimaartussaammata.
Nalunaaquttap akunnerini 20-t missaanniittuni nunatsinni nipilersullaqqinnerpaat ilaat soorlu makkua appisimaassapput, Ole Kristiansen, Alter Me, Zikaza aamma DDR.
Nipilersortussat siulliit unnugu Nuummi Illorsuaq Timersortarfimmi appisimaassapput, nipilersornerit aamma aqagu tassani ingerlanneqassallutik. Nipilersoqattaarnerillu naggataarlugit sapaatiuppat Katuami tusarnaartitsisoqassaaq.
Atlantic Studiop, Katuap aamma Shotokan Karate Do-p suleqatigiinnerisigut nipilersoqattaarnerit piviusunngortinneqarput.