Sapaatip akunnerata naanerani Ilulissani politiit ulapaarsimaqaat

Ilulissanili politiit ulapaarsimaqaat, pingaartumik aalakoorlutik eqqissiviilliortunut orniguttariaqarsimallutik.

Angut silami artuleqqasoq angerlaattariaqarsimavoq. Inuusuttuaqqat suli 15-it inorlugit ukiullit aqqusinermi aalakkuttut angerlaattaraiqarsimapput.

Arnaq aapparminit persuttarneqarnermi kingorna qimarnguimmi tallimanngormat unnuisariaqarsimavoq aqaguanilu meeqqaminik aallarnerani politiit ikiorsimavaat.

Angallat marlunnik issimasulik Appat eqqaani saavittoq nalunaarutigineqarpoq, ajunngitsumillu naammassineqartoq oqaatigineqarpoq.

Aasianni politiit nalunaarput, isertitsivimmiittoq ataaseq tallimanngormat unnukkut qimaasoq nalunaaquttap akunneri marluk qaangiummata nassaarineqarsimasoq, iserteqqinneqarsimasorlu.

Nanortalimmi niviarsiaraq assammigut qimmimit kiineqarsimavoq, qimmerlu kingorna toqunneqarsimasoq, politiit nalunaarput.

Qaqortumi politiit arfininngormat ulapaarsimapput. Angerlarsimaffinni eqqissiviilliornerit ornittariaqarsimapput, meerartaqarsimanngitsulli oqaatigineqarpoq. Sinerissap sinnerani aamma eqqissiviilliortoqaalussimavoq pinartoqanngitsumilli.