Sapaatip akunnerani tullermi Cairn Energy-p pisortaat tikeraassapput

- Kalaallit Nunaata Naalakkersuisuinit Cairn nalunaarfigineqarpoq, Qeqertarsuup kitaani misiliilluni uuliamik qillerinissanut marlunnut akuerineqarluni.

Kalaallit Nunaanni oqartussat sillimanissamut piumasaqaataasa malinnerannut Cairnip suleqataasalu akuerineqarnerannut pissutaaqataasoq oqarsinnaavugut, Cairn allappoq.

Qajannaatsumik pilersaarusiorsimaneq Naalakkersuisut akuersinerannut ilapertuutaasimasoq Cairn aamma allappoq.

Ukiut pingasut matuma siorna Cairn Energy Kalaallit Nunaanni uuliasiornissamut soqutiginninnera aallartippoq. Ukiut taakku ingerlaneranni imartaq 72.000 kvadratkilometeri misissorsimavaat.

Cairn Energy neriorsuivoq, uuliamik qillerinerminni kalaallit ilinniartinniarlugit, siunissami periarfissaqalerniassammata qillerivinni sulisarsinnaanermut. Cairn Energy aamma neriorsuivoq sullissisussat kalaallit suleqatiginiarlugit, assersuutigalugu Air Greenland, Royal Arctic allallu.

Cairn Energy 18 million koruuninik aningaasaliillutik, Kalaallit Nunaanni avatangiisinik misissuinerit tapersersorniarlugit aamma nalunaarput.