Sapaat saarullimmik sammisaqarfiusoq
Pikialaartitsineq tallimanngormat aallartimmalli inuit 1500 missaat Katuamukarput, kalaalimerngillu pillugit oqalugiartut tusarnaarlugillu nerisassaataannit akeqanngitsumik misiliipput.
Nerisassiornermik iffiornermillu unammisitsisoqarpoq, piffissallu ingerlanerani kalaalimerngit allanngorarsimanerannik aamma oqaluttuussisoqarluni.
KNAPK Sermersooq Business Councililu suleqatigiillutik pikilialaartitsineranni ippassaq sapaat ulloq tamaat saarullimmut tunngatinneqarpoq.
Soqutiginnittullu Islandimi saarullimmik Nunatsinnit annerusumik atuinerannik misilittakkat ilaatigut qimerloorsinnaavaat
- Saarullik Islandimi inuussutissarsiutigiuaannarnikuuarput. Saarulliup kiluumut nalinga allisinniarlugu piffissamik aningaasanillu eqqissilluta atuinikuuvugut, suliffeqarfimmi Nordic Marimi pisortaq Jon Gardar Gudmondsson oqarpoq.
Saarulliup kiilumut naleqarnerulersinnissaa Royal Greenlandimit aamma anguniarneqarpoq, suliffeqarfiullu suliniutaa nutaaq, Nutaaq Codimik taaguutilik, tassa Saarullik Nutaaq, saqqummiunneqarpoq.
- Saarullimmit anginerusumik atuinissarput sulissutigissavarput. Saarulliup niaqua sinnikuilu ilanngullugit atornissaat ilinniassavarput. Naak unammillernartoqaraluartoq, periarfissat amerlasoorujussuupput, Royal Greenlandimi saarulliit pillugit ingerlatsinermut pisortaq Sten Sørensen oqarpoq.
