Sap. ak. 18-imi aaqqissuussinerit aningaasaliiffigineqarput
Imigassaq, imigassamik atueriaatsit imigassartoriaatsillu nuna tamakkerlugu sapaatip-akunnerani 18-mi immikkut sammineqartarput - ukiormannalu qulequtaritinneqarpoq ”Aquguk- aqunneqarnak".
Innuttaasut akornanni imigassamik atuivallaarnerup appartinneqarnissaa, taamaasiornikkullu, pingaartumik meeqqani, inuusuttuni ilaqutariinnilu inuunerup naleqarnerulersinnissaa, anguniarlugu, atornerluineq pinaveersaarniarlugu suliniarneq patajaallisartuarneqartoq, Peqqissutsimut Naalakkersuisup, Steen Lyngep, oqarnera naapertorlugu, Naalakkersuisut kissaatigaat .
- Meeqqat inuusuttullu, inersimasut oqaasi malinnagit, iliuusaannik issuaasarnerat tappiilliorfigeqqajaaneqarpoq, Steen Lynge oqarpoq.
Imigassap suunera, qanoq atorneqarsinnaanera inersimasullu imigassartorsimasut qanoq pissusilersortarnerat meeqqat malugisarpaat.
Imigassartoriaatsip allanngortinnissaa kissaatigigutsigu, uagut inersimasut meeqqanut maligassiuisuussaagut. Angerlarsimaffimmi, illoqarfimmi, timersornerup silarsuaani, tusarnaartitsinerni nalliuttorsiornernilu inuttut ataatsimooqatigiinnermut atatillugu takunnissinnaanermut imigassamillu atuinerup allanngortinnissaanut tunngassuteqarpoq, Peqqissutsimut Naalakkersuisoq, Steen Lynge, oqarpoq.
Sapaatip-akunnera 18 ukiormanna apriilip ulluisa 28-annit maajip ulluisa sisamaasa tungaanut pissaaaq, ukiormanalu Imigassaq Ikiaroornartorlu pillugit Siunnersuisoqatigiit siunnersuutaat pingasut tunngaviusussat tassaapput:
- Meeqqat inuusuttullu 18-iliineqanngitsut imigassartunngilluinnartariaqarput, - naartuguit-imigassartoqinak, naartulernissat pilersaarutigigukku imigassartoqinak, aamma: - imigassartornermi imertarfiit sisamat sinninngisaannakkit.
