Saniatigooralugu piniartartut akerliupput

Taamaliorput Naalakkersuisut siunniummassuk inuussutissarsiutigivillugu piniartut januarip aallaqqaataaniit kisimik qaqortanik qernertanillu qilaluganiarsinnaalertariaqartut.

Atsiornernik katersinermut sulissutiginnittoq Saaleeraq Johansen Ilulissaneersoq:

- Illoqarfinni sisamaannarni atsiornerit 867-it katersorpavut. Illoqarfinni allani katersorneqartut Piniarnermut Aalisarnermullu Naalakkersuisoqarfimmut toqqaannartumik nassiunneqarsimammata, katillugit akerliulluni atsiornerit 1100 missaanniissasut naatsorsuutigaara, Saaleeraq Johansen oqarpoq.

Sooruna atsiornernik katersisoqartoq?

- Inuiaqatigiit taamatut avissaartuutsinniarnerat pissusissamisuunngilaq, ingasappallaarpoq. Qangaaniilli ileqqoraarput soorlu niuertorutsit ajoqit allalu atorfillit aamma piniarnermik ingerlatsisartut. Kultuuri tamanna ullumi aamma piuvoq. Kultuurilu tamanna Naalakkersuisut nungutinniarpaat, Saaleeraq Johansen oqarpoq.

Piujuaannartitsinissap Nunatsinni pingaartinneqarnera eqqaagaanni pissussisamisuunnginnerluni inuuniutigivillugu piniartut kisimik qilalugarniarsinnaassappata?

-Tamanna inissaminiinngilaq, ingasappallaarpoq. Saniatigooralugu pinialuttartut amerlanngikkaluanik pisaqarsinnaasariaqarput, Saaleeraq Johansen oqarpoq, nangillunilu:

- Qangaaniilli kultuuritoqarisimavarput. Ullumikkut piniartut Pisiffimmut mattannik annertuunik tunisisarput, tamakkulu pisiarissallugit assut akisupput.

Taamaattumik saniatigooralugu piniartartut pisassanik ilangersilaarsinnaasariaqarput.

Qilalukkat qaqortat qernertallu illersorneqarnissaat pillugu tusarniaaneq decemberip 22-ani 2010 naavoq. Atsiornerit 867-it Ilulissani, Qeqertarsuarmi, Aasianni Ummannamilu katersorneqarput.