Sangusaartartorpassuit aappaagu Nuummukassapput

Sangusaartartut, sungiusaasut allallu, pilersaarutit eqquutissappata Nuummut aappaagu apriilimi tikissapput, tusagassiortorpassuillu Europami aviisini annerni sulisut aamma tikissangatinneqarlutik.
Schladmingimi pissartanngorniunnissamik aaqqissuisut siulittaasuat, Reinhold Zitz, taama oqarpoq.

Nuummi aaqqissuussinissaq taassuma isumalluarfigaa:

- Ilaana, periarfissaqarluarpoq. Tikilluaqquneqarluarpugut, avatangiisinillu mianerinnittuunersi takusinnaavarput, nunataalu nuanneqaluni. Tamaammat aappaagu aaqqissuussinissaq erinigeqaara, Reinhold Zitz oqarpoq.

Tusagassiortut 100-nit amerlanerusut Nunatsinnukarnissaat, taassuma ilimagaa:

- Taamaammat neriuutigaara avammut nittarsaalluarneqaannarata Kalaallit Nunaat aamma nittarsaalluarneqassasoq, taanna oqarpoq, Nuummilu aaqqissuussinissap tunuliaqutaa nassuiarlugu:

- Ukiut 13-it matuma siornatigut assingusumik isumassarsivugut. Nunarsuarmi pissartanngorniunnerit Østrigimi 2001-imi taamanikkut ingerlanneqartussanngormata, Østrigip sangusaartartui, De Forenede Arabiske Emiratinut angalaartippagut, tusagassiortut peqatigalugit inoqajuitsumi sioqqani taamanikkut sisorartikkatsigit. Tamanna iluatsilluarpoq, Nuummilu aaqqissuusinikkut taama aamma angusaqarniarpugut, Østrigimi Schladmingimi Nunarsuarmi pissartanngorniunnissamik aaqqissuisut siulittaasuat, Reinhold Zitz, oqarpoq.

Nunarsuarmi OL-imilu siornatigut pissartaasarsimasut Franz Klammer aamma Hermann Maier, Nuummi aappagu unammeqaataasussanut ilaapput.