Sandyp appaliarsuit tingissimavai
Ulussaarsuup Sandyp USA-p avannamut kangiata sineriaata ilarujussua, sapaatit akunnerisa pingasut matuma siornagut aqqusaarpaa. Anorersuup timmissat tamaanga pineq ajortut Europameersut Nunatsinneersullu nassatarisimagai, maanna paasinarsivoq.
Timmissat qanorpiaq pisimanerlutik anorersuup kaavittuliorneranit aallarunneqarsimapput.
Amerikamiup timmissanik immikkut ilisimasallip, Wayne Petersenip tv-qarfimmut oqaatigaa, tamanna kuussuarmut sakkortuumik kuuttumut nakkarnertut assersuunneqarsinnaasoq: Piumassuserinngisamik aallarunneqarnertut ippoq. Timmissat ilaatigut appaliarsuit Nunatsinneersorineqartut taama pisimapput.
Timmissat ilaat suli uumallutik tamaanga annguttut qasoqqasorujuussuupput kaaqalutillu, amerlaqisulli anorersuarmit nassataritinnerminni toqusimanissaat ilimagineqarpoq.
