Sander: Canadamiut russillu iliuusaat aasaanerani pequffannerupput
Naalagaaffiit arlallit Qalasersuarmut oqartussaaniullutik pilerngunnerat Danmarkimi Folketingimi naalakkersuinermik suliallit ernumanartoqartinngilaat.
Canadamiut russillu Qalasersuarmi oqartussaalerusullutik iliuusaat ilisimatusarnermut ministerip Helge Sanderip aasaanerani pequffannertut taavai.
2014-imi Qalasersuup eqqaatalu aalajangiiffigineqarnissaanut atatillugu, russit Qalasersuarmi immap naqqanut erfalasuliinerat sunniuteqarnavianngilaq.
Naalagaaffiit Peqatigiit Imavinnut inatsisit pillugit isumaqatigiissutaanni erseqqissumik uppernarsaateqarnissaq piumasaqaataavoq, tassami taakkua aallaavigalugit nunaviup tunngavii pillugit kommissioni aalajangiisussaammat. Taamaattumik russit erfalasuliinerat Canadamiullu ministeriunerata Qalasersualiarnera aasaanerani pequernertut isigaakka, Helge Sander oqarpoq.
- Danskit kalaallillu tungaanniit iliuuserisassavut ersarissumik pilersaarusiugaapput. 2004-mi aamma 2005-imi minnerusunik pilersaarusiukkanik suliaqartoqarpoq. 2006-imi annertunerusumik nunamiit misissuinerit ingerlanneqarput. Ullunilu makkunani pilersaarut immami ingerlanneqartussaq aallartereerpoq. Sikunik aserorterut maanna ingerlaaleruttorpoq paasissutissanillu katersineq iluatsissappat 2009-mi aamma 2011-mi annertusisamik misissuinissaq pilersaarutigaarput, Helge Sander Radioavisimut taama oqarpoq.
- Nunarsuatta ilaa tamanna aningaasarsiorneq eqqarsaatigalugu soqutigineqaqaaq, kisianni qanoq iluanaarutaatigisinnaanersoq maanna suli naluarput, taamaattorli Amerikamiut ilisimatusartui isumaqarput uuliaqarfiup suli paasineqanngitsup 25 procentia Kalaallit Nunaata avannaani, Qalasersuup eqqaaniissagunartoq, Helge Sander taama naggasiivoq.
