Sanasoq Nuummi Blok 1-ip ingutserneqarnera pillugu: Siusippallaarujussuarpoq
Amerlasuut meeraanerminni najugaat. Nuummi Narsarsuarmi Blok 1. Sivisuumik inoqanngereerluni maanna ingutserneqareersimalerpoq.
Danskit sanasut Blok 1 1968-imi sanaartorlugu aallartippaat.
- Blok 1-imik sanaartoqataavunga, Karl Bejder nunatsinni ukiuni 57-ini najugaqarlunilu sulisimasoq oqarpoq.
Ilisimaneqarluartoq, Blok P siulliullugu 1965-imi sananeqarpoq. Tamatuma kingorna blokkit qulit Narsarsuarmi sananeqarput.
- Kalaallit Nunaanni taama sanaartortoqartigissasoq kialuunniit taamani takorluunngilaa, Karl Bejder oqarpoq.
Video: Kommuneqarfik Sermersooq
Blokkit qulit ukiup ataatsip ingerlanerani sananeqarput, 1969-imilu upernaakkut nutserfigineqarlutik.
- Taamani inissaaleqisoqangaatsiarpoq. Naak inissaaleqisut ikiliartoraluartut ukiorpassuarni inissaaleqisoqarpoq. Kisianni tassa inissaaleqisoqangaatsiarpoq, inissianilu ajortuni inoqarpallaartunilu najugaqartoqarpoq, Karl Bejder oqarpoq.
Blok 1-ip ingutserneqannginnerani. Assi: Kommuneqarfik Sermersooq.
Blok 1-ip ingutserneqarnissaa Nuuk Centerip sananeqarneranili aalajangerneqarpoq. Nuuk Centerip eqqaani biilinut unittarfiliortoqarnissaa pissutigalugu Blok 1-imi najugaqartut 2016-imi novembarimi inigisaminnit anereertussaapput.
Sukkavallaarujussuartoq
Blok 1-ip sananeqarneranit ukiut 50-it sinnilaaginnarlugit qaangiupput. Ingutserneqarneralu sanasup Kaj Bejderip siusippallaarujussuarsoraa:
- Blokkit ingutserneqarnissaannut sukkavallaalaartoqarsoraara. Aamma Tuapannguani blokkit Q, R aamma S ingutserneqarnikuupput. Qassiiusut sukkasoorujussuarmik ingutserneqarnikuupput. Inissiammi ukiut 50-it missaat qaangiutiinnartut ingutserneqarnerat sukkasoorujussuuvoq.
- Inissianik sanaartorneq akeqanngitsuunngilaq. Inissiat betonngimik sanaajusut ukiorpassuarni atasinnaapput, betonngilu ukiut ingerlanerani ninnguleriartuinnartarluni.
Borgmesteri nuannaartoq
Kommuneqarfik Sermersuup Blok 1-imik piginnittuuneq Namminersorlutik Oqartussanit tigunikuuaa.
Inissiallu nutarterneqartariaqarluinnartup ingutserneqarnera borgmesterip allaffianit nuannaarutigineqarpoq.
- Blok 1 piffissami sivisuumi inoqanngilaq, taamaammat ingutserneqarnera illoqarfittalu qeqqani nutaanut inissaqartitsisoqalernera nuannaarutigaara, borgmester, Charlotte Ludvigsen oqarpoq.