Sanami uninngasut nerisatik assigiiaarpallaarnerarpaat

Dronning Ingridip napparsimmavissuani uninngasunut nerisassat sassaalliutigineqartartut assigiiaarpallaarput. Uninngasut arlallit nerisassat naammaginagit uninngaqatertik Abel Schmidt tusagassiortunut saaffinnittussatut toqqarsimavaat. Abel Schmidtip Dronning Ingridip napparsimmavissuani ullut arfinillit uninngareerluni malugisinnaasimavaa, nerisassat sassaalliutigineqartartut assigiiaarnerat.

Abel Schmidtip nerisassat SANA-mi sassaalliutigineqartartut ajoralugit ajorivillugit oqaatiginianngikkarluarpai, kisianni ullut arfinillit ingerlaneranni uninnganermini maluginiarsimavaa, ullaakkorsiutit taakkuinnaavissuusartut, qatsunnartullu. Assersuutigalugu iffiaq qaqortoq mamalaalerlugu taamaallaat, aammalu qorlortitat nerineqartarput ullaakkut. Allanngortinneqartarsinnaagaluarput, aperalutilluunniit sutorusuttoqarnersoq. Amerlanerpassuit ullaakkut nererusunneq ajorput, taakkuinnaat qatsuttaramikkit, Abel Schmidt oqarpoq.

-Ullup qeqqanut unnukkullu nerineqartartut taakkuinnaagajuttarput. Abel Schmidt Dronning Ingrid-p napparsimaviani unninngaqatigisaminit kajumissaarneqarnini aallaavigalugu, naammagittaaliuutaat tusagassiortunut annguppaa.

Dronning Ingridip napparsimmaviata igaffissuani nerisassat uninngasunut sassaalliutigineqartartut suussanersut sapaatip-akunnera ataaseq sioqqullugu piareersarneqartarput. Ulloq ataaseq allortarlugu kalaaliminermik igasoqartarpoq, soorlu ippassaq saarullittortut. Dronning Ingridip napparsimmavissuani immikkoortortani, tassa afdelingini, peqqissaasut ningiui, igaffimmiunik qaammammut ataasiarlutik ataatsimeeqateqartarput. Ataatsimiinernilu naammagittaaliuutit igaffimmut anngunneqarsinnaasarlutik.