Sanaliaassat amerlanerit uninngasariaarupput

Taakkunannga 25-t ippassaq SANA-miikkunnaarput. Dronning Ingridip napparsimmavissuani peqqissaasut pisortaata Ella Skiftep ilisimatitsissutigaa, uninngasuni 14-iusuni sinneruttuni aqqaneq marluk ualimut sisamanut SANA-miikkunnaassasut tamatumalu kingorna angallamik sukkasuuliamik Targamik Maniitsuliaanneqassasut. Angallat aqqaneq marluinnarnik ilaasoqarsinnaammat, taakkunannga 14-iusunit marluk ilaasortaammi timmisartumiluunniit inissaqalerunik angerlarumaartut, Ella Skiftep oqaatigaa.

Ajutoornikkut napparsimmavimmut unitsinneqartut Maniitsumit Dronning Ingridip Naapparsimmavissuanut ataasinngormat unitsinneqarput. Taakku ilaat sulisartuupput, ilaat pisiniarfimmi sulisuullutik ilaallu pisiniartartuullutik. Taakkunannga sulisartut anersaartorniarnermikkut eqqugaanerusimasut, Ella Skiftep oqaatigaa.

Maniitsumi Brugsenimi sulisartut ataasinngormat ualikkut natermut nutaamut sitsiaallisaaneranni ajutoorneq pivoq, silikone-lerineranni toqunartortalinnik pisiniarfiup iluani aalannguuttoqarmat.

Maniitsumi Brugseni taamanili matoqqatinneqalerpoq, maannalu ammaqqinnissaa Sullivinnik Nakkutilliisoqarfiup akuerereermagu aqagu ammaqqittussanngorluni.

- Ammaqqittussanngornerput soorunami nuannaarutigeqaara, tassami sulinerput ingerlaqqissinnaaniassammat. Matumani aningaasanut tunngasut pingaarnerunngillat, ulluinnarnili inuunitsinnut uteqqinnissarput pineqarluni, Brugsenimi pisortaq Allan Nielsen oqarpoq.