Sanaartortut silamut naleqqussarput
Silaannaap allanngornerani sila peqqarniinnerulerpoq sanaartorfiit ilai ajoqusersinnaasarlugit. Silaannaap allanngornerata aamma nassataraa silap masannartuliornerulernera tamannalu oqoqalerneranut aallarniutaasinnaavoq.
Taamaammat anorimut illersuutip Windstopperip Nunatsinni tunisaanera annertuserujussuartoq atuagassiaq Mestertidende allappoq.
Sanaartornermi atortut krydsfinerit allallu qisummit sanaat isugutammit eqqortiasuupput. Sanaartornermilu atortut isugutassimasut oqummut aallarniutaasinnaasarput, oqullu nuna tamakkerlugu ajornartorsiutinngorsimavoq.
Maanna sanaartornermi atortunik tunisassiortoq Cembrits anorimut illersuummik sanasimavoq fibercementimik taaneqartartumik sanaajusumik, taannalu isugutammut qisunnit akiuussinnaaneruvoq.
- Anorimut illersuut taanna qallerneqarsimanngikkaluarluni sivisuumik ammaannartumiissinnaavoq illup silataata matuinnissaata tungaanut. Taamaattumik taanna maanna atorusunneruarput. Maani sila pakasaasinnaasarpoq taamaattumik sanaartornermi atortuvut ulluni arlalinni illersorneqaratik anorersuarmut akiuussinnaasariaqarput, Permagreenimi sanaartukkanut pisoraq Torben Olsen Mestertidende-mut oqarpoq.
Sanaartortutsilarlutsillugu sulinertik ulluni arlalinni uninngatikkallarsinnaasarpaat, taamalu pisoqartillugu sanaartornermi atortut isugutammik milluaasinnaasut ulluni arlalinnik assersorneqaratik uninnganertik attassinnaaneq ajorpaat.
