RAL-ip ajornartorsiutai pillugit Sanaartornermut ataatsimiitsitaliaq nassuiaaneqarusuttoq
Royal Arctic Linep sullissinera pillugu sanaartornermut ataatsimiitsitaliami ilaasortat Naalakkersuisut nassuiaanissaat maanna piumasaraat.
Assartuinerup kipiluttunarnera pillugu sanaartornermut ataatsimiitsitaliami ilaasortanit suli eqqartorneqanngilaq.
KNI-p RAL isornartorsiorpaa
Royal Arctic Line-p ajornartorsiuteqarnera pissutaalluni Namminersorlutik Oqartussat aamma KNI pilersuisussaatinaanermik isumaqatigiissutaat piviusunngortikkuminaallinera pillugu, KNI-mi pisortaanerup Peter Grønvold Samuelsenip Royal Arctic Line sakkortuumik isornartorsiorpaa.
Sanaartornermut ataatsimiitsitaliami siulittaasup Bendt B. Kristiansenip pisoq ilungersunarnerarpaa.
- Taamaattumik aamma ataatsimiititaliap ulluni kingullerni Naalakkersuisut naappinneranut allanut attuumassuteqartuni kissaateqarfiginikuuarput Naalakkersuisoq Erik Jensen pisut uku kingullerni qaammatini arlalinngulertuni pisut sukumiinerusumik ataatsimiititaliamut nassuiaasuteqarfigissagai, Bendt B. Kristiansen KNR-mut oqarpoq.
Erik Jensen maannamu oqaaseqarsinnaanngikkallarpoq
Naalakkersuisut umiarsuaatileqatigiiffiata ilungersunarnera pillugu Naalakkersuisut qanoq iliuseqarfiginiarneraa pillugu, KNR-imiit Erik Jensen apersorumasimagaluarparput. Maannamullu oqaaseqarsinnaanngikkallarnerarpoq.
Sanaartornermut Ataatsimiitsiliamit naalakkersuisut nassuiaataat utaqqiinnartariaqassavaat:
Ataatsimiitsitaliap ulluinnarni pisut pulaffigisinnaannginnamigit, kisianni naalakkersuisoqarfiit ataani susassaqarfigineqarmata, selskab-inullu tunngasut aamma Naalakkersuisut siulittaasuaniillutik. Taamaattumik malinnaavugut aamma nassuiaaneqarnissamik piumasaqarpugut ataatsimiitsitaliaminngaanniit, Bendt B. Kristiansen oqarpoq.
