Sanaartornermut allaffissorneq INI-mit akisussaaffigineqalerpoq
Sanaartornermut allaffissorneq INI-p 2009-mi novembarip aallaqqaataaniit Namminersorlutik Oqartussanit tiguaa.Tassani ilaatigut atuarfinnik, kollegianik, napparsimmavinnik suliffeqarfinnillu sanaartorneq pineqarpoq.
Allattoq Elisa Isaksen
novembarip 05-at 2009 07:22
Pingaarnertut INI-p suliassat pilersaarusiorneqarnerat ingerlatissavaa, sanaartukkanilu aningaasaqarneq, pilersaarusiorneq, siunnersuinermut isumaqatigiissutit, suliariumannittussarsiuussinerit aqussallugit.
Tigusinermut atatillugu Namminersorlutik Oqartussani sulisut arlallit INI-mut nuunneqassapput.
Aallaqqaataani sulisut taakku Namminersorlutik Oqartussani inissisimagallassapput. 2010-mi januaarip aallaqqaataaniit, INI-p teknikkikkut immikkoortortaqarfia aamma Illuutinut Upalungaarsimanermullu Aqutsisoqarfik kattunneqarumaarput.
Namminersorlutik Oqartussat tatiginninnermik angisuumik taamatut takutitsinerat INI-mit nuannaarutigineqartoq, teknikkimut pisortap Jesper Johannesenimit oqaatigineqarpoq.
