Sana-mi uivertoqalissasoq peqqissaasut ilimagaat

- Immikkortoqarfitsinni inuit 13-it uningasinnaapput. Kisianni saaatit akunneri kingulliit sinneqartuaannarput, torsuusani uninngasoqartarluni. Aamma unittartut naliliinera naapertorlugu napparsimanerulernikuupput, unikkiartornissaminnut sivisunerusumik utaqqisaramik. Tamanna ajoraluaqaaq. Assersuutigalugu sapaatit akunnerat kingulleq inuit arfineq pingasut kinguartittariaqarsimavagut, Naja Kriegel oqarpoq.

Qinersisoqartussanngormat, aningaasarsiat pillugit isumaqatigiiniarnerit unittooqqapput. Naja Kriegelip, Peqqissaasut Kattuffianni siulersuisunut ilaasortaasup, tamanna ajuusaarutigaa, isumaqarporlu, Naalakkersuisunngorumaartussat tamatumunnga suliassaqaqisut.

- Peqqissaasunik Nunatsinnut qinnuteqartoqassappat, akissarsiat apeqqutaaqaat, maannalu mikivallaaqqaat. Isumaqatigiiniarnerilli unittooqqammata, peqqissaasunik qinnuteqartoqarnavianngilaq, taavalu vikarit atortariaqarpavut, taakkulu akisunerupput, Naja Kriegel oqarpoq.

Taassuma aamma immikkoortoqarfimmi ningiussup anilaanngatigaa, akissarsiat qaffanneqanngippata, immikkoortoqarfimi maanna sulisuusut allani suliffissarsiulersinnaasut.

- Uanga isumaqarpunga, Naalakkersuisut paasinerusariaqaraat, Nunatsinni pitsaasumik napparsimmaveqarfeqassagutta, taava politikerit iluamik pulaffigisariaqaraatigut. Aningaasat ukiumut qassit atorneqartariaqarnersut paasisariaqarpaat, Naja Kriegel oqarpoq

Taassuma ernummatigaa, aningaasarsiat pillugit isumaqatigiinniarnerit, qinersisoqarnissaa pissutigalugu maanna uninngasut, ukiamut aatsaat aallarteqqissasut.