Pituffik Folketingimi ullumi isumasioqatigiissutigineqalersoq
Sakkutooqarfimmi sullissinermut isumaqatigiissutip suliariumannittussarsiuunneqannginnerani, Kalaallit Nunaata soqutigisai Danmarkip qanoq nakkutigilluartigisimanerai, nunanut allanut ministerip nassuiaateqarfigissavaa.
Pituffimmi sullissinissaq suliariumannittussarsiuunneqarmat, tamanna amerikamiut suliffeqarfiannut, taamaattorli danskit suliffeqarfianut allamut attuumassuteqartumut suliaq tunniunneqarpoq, tamannalu pilluni oktobarip qaammataani.
AAMMA ATUARUK Nunanut allanut ministeri Pituffik pillugu nassuiaasussanngorpoq
Amerikamiut sakkutooqarfiannit aningaasat Nunatta karsianut isertinneqartartut taamatullu suliffiit kalaallinit ullumikkut suliffigineqartut ikinnerulernissaat, kalaallit Folketingimi ilaasortaasut aarleqqutigalugu danskit nunanut allanut ministeriannit tassa maanna isumasioqateqarput.
Pituffik pillugu Folketingimi, sapaatip akunnerata uuma aallartilaarnerani oqallittoqarnerani, Martin Lidegaardip oqaatigaa, Pituffimmi amerikamiut sakkutooqarfia, Danmarkimit qanoq pingaatinneqartiginersoq amerikamiunit ilisimaneqarmat aamma sakkutooqarfiup, sapinngisaq tamaat atorlugu, Kalaallit Nunaannut iluaqutaanissaa amerikamiunit pingaartinneqartoq, nunanut allanut ministerip, Martin Lidegaardip oqallinnermi oqaatigaa.
