Sammisaqartitsinermi aningaasarsiat 2005-imili allanngortinneqarsimanngitsut allanngortinneqalerput

Ulluunerani ornittakkani, orniguttarfinni, sannavinni illersugaasuni imaluunniit suliffinni illersugaasuni inunnut innarluutilinnut immikkut suliffeqartinneqartunut sammisaqartitsinermut aningaasarsiaritinneqartartut 2005-ip kingornali iluarsiivigineqarsimanngillat.
Allattoq Karsten Sommer
novembarip 29-at 2019 19:21
Nutserisoq Mads Lynge

Tamanna maanna allanngortinneqartussanngorpoq. Aningaasarsiat pisortanit ikiorsiissutaasartut allat assigalugit siunissami ukiumoortumik iluarsineqartarnissaat qularnaarneqarpoq. Naalakkersuisut nittartagaanni tamanna atuarneqarsinnaavoq.

Aningaasarsiaritinneqartartoq 2005-imit januaarip aallaqqaataani akunnermut 15 koruuniusimavoq, ingerlaavartumillu iluarsineqartarsimanani.

Inuit innarluutillit tapersersorneqarnissaannut inatsisip nutaap atuutilerneranut atatillugu sammisassaqartinneqarnermut aningaasarsiat siunissami SIK-p isumaqatigiissutai malillugit akunnermut akissarsiap minnerpaaffiata 25 procentianut aalajangersarneqartassapput.

Taamaalilluni tamanna imatut isumaqassaaq sammisaqartitsinermut aningaasarsiat malunnartumik qaffariaateqassammata kiisalu ingerlaavartumik iluarsiivigineqartalerlutik. Erseqqinnerusumik oqaatigalugu sammisaqartitsinermut aningaasarsiat 2020-mit januaarip aallaqqaataani atuutilersumik nalunaaquttap akunneranut 24,02 koruuninut qaffanneqassapput,  2020-milu apriilip aallaqqaataani atuutilersumik nalunaaquttap akunneranut 24,57 koruuninut qaffaqqillutik.

- Ukiut ingerlanerini inuit innarluutillit pitsanngorsaatissatut kaammattuutigisartagarpassuisa maanna Naalakkersuisunit naammassineqarsinnaasimanerat assut nuannaarutigaara, Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk