Avatangiisit

Saligaatsoq ukiut arfinilissaannik saliisitsilersoq

Ulloq saliiffiusoq, Saligaatsoq, ileqquusumik ukioq manna juunip qaammataani kingumut ingerlanneqassaaq.
Siornatigut saliisoqarneranit assilisaq. Assi © : Helle Nørregaard
Allattoq Inge S. Rasmussen
juunip 01-at 2016 06:23
Nutserisoq Simon Uldum -

Siullermeertumillu imaani aamma saliisoqarniarpoq. Nuummi aqqartartut Nuutoqqap saavani saliiniartut, CSR Greenland, aaqqissuussinernik ataqatigiissaarisuusoq, taama ilisimatitsivoq.

Sinerissami pisussat ulluni assigiinngitsuni ingerlanneqassapput, suliffeqarfiillu sulisutik suliffeqarfiup eqqaani illoqarfinnilu saliitissavaat.

Puiaasakunik, sikaratsit kimmiviinik eqqakkanillu allanik katersinissamut aaqqatissat puussiassallu aningaasaliisunit isumagineqassapput.

Ukioq manna aaqqissuussinerit Tasiilami juunip arfineq-aappaani, Ilulissani Paamiunilu juunip arfineq-pingajuani kiisalu Nuummi Sisimiunilu juunip 14-iani ingerlanneqassapput. Suliffeqarfiit ulluni taakkunani peqataarusuttut, najukkaminni attaveqarfissartik Saligaatsup Facebookimi qupperneratigut nassaarisinnaavaat.

Pinngortitamut, Avatangiisinut Nukissiuuteqarnermullu Naalakkersuisoq Mala Høy Kúko Nuummi ammaanermi oqalugiartuussaaq. Tamanna juunip 14-iani nalunaaqutaq 13.30 kulturikkut illorsuarmi Katuami pissaaq.

Aamma atuaruk