Sakkutuut politiillu 3.500-t Haitiliartinneqassapput
Taakku Haitimi isumannaallisaanissamut, inuillu hunnoruju tuusintilikkaat ikiorserneqarnissaannut ikiuutissapput. Ullumikkut Haitimi sakkutuuliussat politiillu 9.000-it missaaniipput, taakkulu tassa sakkutuunik politiinillu 3.500-nik ilaneqassallutik.
Naalagaaffiit Peqatigiit sakkutuuisa qullersaat Alain Loroir-ip Naalagaaffiit Peqatigiit sakkutuuliussassaasa pingaaruteqarneri oqaatigaa, tassami ikiorsiissutit suli apuutinngitsulluunniit saassunneqarsinnaammata ujajaaffigineqarsinnaallutillu.
Naalagaaffiit Peqatigiit politiiliussai nerisassanik imermillu agguaassiffiusuni inississorneqassapput, sakkutuullu isumannaallisaanermik suliaqassallutik, amerikamiullu sakkutuui 2.500-ut Haitip avatinnguani nunnigunneqarnissartik utaqqiinnarpaat, sulilu amerlanerit tikerartinneqarnissaat naatsorsuutigineqarpoq.
Ikiorsiissutissanik agguaavissat 15-it pilersaarusiorneqareerput, ullumilu amerikamiut qulimiguulii siulliit Haitip præsidentiata illorsuata silataanut nunnipput, tamaanilu ikiorsiissutinik agguaaviliortoqarnissaa naatsersuutigineqarluni.
Amerikamiut franskillu ulluni kingullerni aaqqiagiikkunnaaraluarnerat taamaasilluni unitsinneqarpoq, ilami franskit oqaasii naapertorlugit amerikamiut nunamik tiguaaniartutut pissusilersorneraraluarpaat, tamakkuli pisuutitsiniutit Naalagaaffiit Peqatigiit aqqutigalugit qaangerneqarput.
Franskit præsidentiata Sarkozyp amerikamiut ullumi nersualaarpai, Naalagaaffiillu Peqatigiit nerisassaqartitsiniarnermut suleqatigiiffia amerikamiunik ippassaq isornartorsiuisimagaluaqisoq maannakkut aamma nersualaarinnittunut akuleruppoq.
