Sakkutuut paasititsiniaallutik ullorititaat illoqarfinni arlalinni ingerlanneqassaaq
Illoqarfinni Sakkutuut Issittumi suliassaat, sakkutuujunissamik pisussaaffeqarnermi ilinniartitaanerit aamma Sakkutooqarfimmi atorfeqarnissamut periarfissat pillugit Sakkutuut paasissutissiinernik ingerlatsissapput. Taamatuttaaq aamma allattariarsornermi timikkullu pisinnaasat misilerarnissaannut periarfissaqassaaq.
Inuussutissarsiornermut, Suliffeqarnermut, Niuernermut Nunanullu Allanut Naalakkersuisup Vittus Qujaukitsup Illersornissaqarfiup Nunatsinni paasititsiniaaqqilernera nuannaarutigaa:
- Ullut paasititsiniaaffiusut ukioq manna ingerlanneqaqqissammata nuannaarutigaara. Sakkutooqarfimmi ilinniartitaanerit assigiinngitsuupput, inuttut ineriartornertut, inuusuttut ilinniartitaanerannut allanut alloriarnertut imaluunniit inuussutissarsiutigalugu atorfeqalernissamut aqqutissatut, atorneqarsinnaasut, aammalu neriuutigaara inuusuttortatta neqeroorut tigulluassagaat, Vittus Qujaukitsoq taama oqarpoq.
Ulloq paasissutissiiviusoq Sakkutooqarfiup, Naalakkersuisut, Kommunit kiisalu najukkani Piareersarfiit akornanni suleqatigiinnikkut ingerlanneqarpoq. Inuusuttut illoqarfimmi najugarisaminni Sakkutooqarfiup nittartagaa aqqutigalugu imaluunniit najukkami Piareersarfik attaveqarfigalugu, Sakkutuut Paasititsiniaallutik ullorititaannut peqataanissamut nalunaarsinnaapput, tassani aamma ilinniartitaanermut paasissutissat atuagaaqqat tunniunneqarsinnaallutik.
Sakkutuut Paasititsiniaallutik ullorititaata inuusuttunit atorneqarluarumaartoq Vittus Qujaukitsup neriuutigaa.
- Inuusuttut amerlanerusut Sakkutooqarfimmut isertinniarnissaannut periarfissaqarfiusut annertoorujussuupput. Sakkutooqarfiup Issittumi suliassanik suliarinnittarnissaa pisussaq pillugu nalunaarusiap qanittumi tamanut saqqummersinneqartup aamma takutippaa, suliassarpassuit pingaaruteqartut ullumikkut aammalu siunissami Kalaallit Nunaanni issittumilu sumiiffinni isumagineqartartussaasut. Tassani neriuutigaara Sakkutuut Paasititsiniaallutik ullorititaanni inuusuttut amerlanerusut Kalaallit Nunaanni Sakkutuuni sulinissamut piumassuseqalersinneqassasut.
Nuummi aggustip 29-ani Sakkutuut Paasititsiniaallutik ullorititaannut atatillugu danskit illersornissamut ministeriata Peter Christensenip peqataaffigisaanik tusagassiortunik katersortitsisoqassasoq, Naalakkersuisut aamma ilisimatitsipput.
Illoqarfiit tikinneqsrtussat tassaapput:
- Tasiilaq, aggustip 16-iani
- Nanortalik, aggustip 19-iani
- Qaqortoq, aggustip 22-ani
- Paamiut, aggustip 24-ani
- Nuuk, aggustip 29-ani
- Sisimiut, aggustip 31-ani
- Aasiaat, septembarip aappaani
- Ilulissat, septembarip tallimaani
