Sakkutuut imarsiortut pillugit atuagaq nutaaq
Umiarsuup sorsuutip Blaa Heyrenip hollandimiunik arfannianik malersuisimanera atuakkiami aallarniutigineqarpoq, taamani arfanniat kalaallinik uukapaatitsisarsimapput saassussisarsimallutillu. Ullumikkulli ilisimasatsituut qallunaat sakkutuui imarsiortut imartatsinni annaassiniartarnermik alapernaarsuinermillu ingerlatsisuupput.
Atuagaq assiliarpassuaqarpoq oqaluttuanillu assigiinngitsunik akuugaalluni, ilaatigut Qeqertarsuup tunuani sorsuussimaneq oqaluttuarineqarpoq annaassiniaqataasimasullu oqaluttuaat aamma ilanngunneqarsimallutik, Maritime Danmark taama allaaserinnippoq.
Nunatsinni sakkutooqarfik - Grønlands Kommando - Siriusikkormiut kiisalu qallunaat sakkutuui timmisartortartut nunatsinni suliaqarsimanerat atuakkiami eqqaaneqarputtaaq, tassalu qallunaat sakkutuuisa nunatsinni suliaqarsimanerat siullerpaamik ataatsikkut eqqartorneqarlutik.
Nunatsinni sakkutuut imarsiortut pillugit Per Herholdt Jensen aatsaat atuakkiulinngilaq. Aamma atuagaq Grønlandssejlerne, atuakkanik saqqummersitsivik Forlaget Nautilus aqqutigalugu saqqummersinneqarnikuuvoq.
