Sakkutuut arlallit aallartissimasariaqanngikkaluarput

Taakkua ilarpassui angutaapput inuusuttut sorsunnermi peqataajartortillugit aallartinneqarsimasariaqanngikkaluartut, tarnit pissusiinik ilisimasalik sakkutuunik sullissisoq aviisimut Informationimut taama oqarpoq.

Qaammatit tamaasa agguaqatigiissillugu sakkutuut arfineq marluk Afghanistanimiit angerlartiinnarneqartarput. Tamatumunnga pissutaasartut annerusumik tassaapput inooqatigiinnikkut pissutsit napparsimanerlu.

- Illersornissamik isumaginnittut sakkutuut taakkua aallartissimasariaqanngikkaluarpaat, tarnit pissusiinik ilisimasalik sakkutuunik sullissisoq Jørgen Peter Madsen oqarpoq, oqaatigalugulu tarnit pissusiinik misissuereernikkut aatsaat aallartitsisoqartalerpat ajornartorsiut minnerulersinneqarsinnaasoq.

- Tarnikkut ajoquserneqarsimallutik angerlaannartut ilarpassui, misissuisoqartartuuppat aallartinneqarsimasariaqanngikkaluarput, Jørgen Peter Madsen oqarpoq.

- Ilarpassuisa angerlartiinnarneqarnertik ajorsarnertut misigisarpaat. Taakkumi inuusuttuupput nunartillu sullillugu aallartinneqartutut imminut isiginertik annaasarpaat, tarnip pissusiinik ilisimasalik oqarpoq.

Tamatuma ajornartorsiutaanera illersornissamik suliaqartut ilumuunnginnerarpaat, isumaqarlutillu sakkutuut angerlartiinnarneqartariaqarnerannut tunngasoq taamaallaat ataasiakkaanut tunngassuteqartoq, Bjarne Møller sakkutuut qullersaqarfianneersoq oqarpoq.