Sakkutuut Afghanistanimit aniatinneqarnissaat isumaqatigiissutigineqarpoq
Afghanistanimi isumannaallisaaneq Kabulimi naalakkersuisuisunit 2014-ip naalernerani akisussaaffigineqalissasoq, nutaarsiassaqartitsivik Ritzau allaaserisaqarpoq.
Natop generalsekretæria Anders Fogh Rasmussen Afghanistanillu præsidentia Hamid Karzai Afghanistanip siuniussaa pillugu ullumi atsioqatigiipput, tamanna pivoq nunat NATO-mi ilaasortat naalakkersuisuisa Lissabonimi ataatsimiinneranni.
- Afghanistanimiut namminneerlutik nunaminni aalajangiisinnaalernissaannut sulineq Lissabonimi aallartipparput, Anders Fogh Ramussen tusagassiortunik katersortitsisoqarnerani taamatut oqarpoq.
- Isumannaallisaanermut oqartussaaffik Afghanistanimiut piareerpata aatsaat tunniutissavarput, oqartussaaffillu tunniunneqareerpat NATO tapersersuisutut inissisimalluni Afghanistanimiikkumaarpoq, Anders Fogh oqarpoq.
- Isumannaallisaaneq Afghanistanimiunut tunniunneqarpat imaanngilaq NATO Afghanistanimiit anissaasoq, danskit ministeriunerat Lars Løkke Ramussen erseqqissaavoq.
Nunat tamat ukioq 2014-ip kingornatigut Afghanistanimiititaqarunnaarnissaat ministeriunerup siunertaannginnerarpaa. Taamaattorli danskit sakkutuuisa Afghanistanimiitinneqartarnerat ukioq 2014-ip kingornatigut unitsinneqassasoq, Lars Løkke Rasmussenip erseqqissaatigaa.
Sakkutuut Afghanistanimi nunap immikkoortuiniitinneqartut 2011-mit aallartittumik angerlakaatinneqassapput, tamatuma kingorna Afghanistanimiut ukiut sisamat ingerlanneranni isumannaallissaanermut sakkutuunit nakkutigineqalissasut, NATO-mi ilaasortat pisortaat Lissabonimi isumaqatigiissutigaat.
USAp præsidentia Barack Obama sakkutuut Aghanstanimit aninissaannut nangaassuteqarpoq. Afghanistanimi pissutsit qanoq ingerlanerat USA-mit takuneqaqqaarnissaat amerikamiunit kissaatigineqarmat.
