Sakkutuut 13.000-it Afghanistanimukartinneqartussanngorput

Aallartinneqartussat tassaanerussapput sakkutuut ikorfartuisussat, soorlu ingeniørit, nakorsat peqqissaasullu, isertortumik paasiniaasartut politiillu. Sakkutuut 21.000-it marsip qaammataani aamma Afghanistanimukartinneqarput, ukulu 13.000-it tassa tapertaajartussapput, aviisimi Washington Postimi tamanna allaaserineqarpoq.

Barack Obamap maanna aamma utaqqivaa amerikamiut Afghanistanimi sakkutuuisa naalagaanertaanit, Stanley McChrystalimit, qinnuteqaat takkuttussaq. Amerikamiut sakkutuuinik suli 40.000-inik Afghanistaniliartitsoqarnissaa Stanley McChrystalip kissaatigaa, sakkutuummi nunanit tamaneersut Talibanikkunnit akerlerineqaleraluttuinnarmata.

Paasissutissat Præsidentip Illorsuanit illersornissamulluunniit ministereqarfimmit oqaaseqarfigineqanngillat.