Sakkutuunik sullissisut amerliartuinnarput
Amerikami Illersornissamut Pisortaqarfiup allilerneqarnerata kingunerisaanik amerikamiut saakutuuinut sullissisut amerlisimasut, Pentagonimit nalunaarutigineqartoq Russit avisiat ullormut saqqummersartoq tallimanngormat allappoq.
Amerikamiut namminersortut suliffiutaasa Blackwaterip aamma Triple Canopyp maanna inuit 250,000-inik amerlassuseqartut sulisitarigaat, nalunaarusiamit takutinneqarpoq.
Washingtonip sakkutuulersuinerani namminersorlutik sullissisut maannamut Iraqimi Amerikamiut sakkutuuisa 25 procentiinik amerlassuseqarput, Afganistanimilu suli amerlanerullutik 30 procentip missaaniikkamik.
Nalunaarusiami ilanngullugu isummersuutigineqarpoq Amerikami Naalakkersuisut oqaatigisartagaat piviusullu imminnut ungasinnerujussuat. Sisamanngorermi Egyptenimi Cairop Ilisimatusarfissuani Barack Obamap tusarnaarterpassuaqarluni oqalugiarnermini oqaatigaa, killeqanngitsumik Afganistanimiinnissaq anguniarneqanngitsoq, saniatigullu oqaatigalugu Washingtonimiit pilersaarutigineqartoq amerikamiut sakkutuui Iraqimiit aniatinneqalereersimassasut 2011-ip naajartornerani.