Sakkutuujusimasup Naalakkersuisut ilitsersulerai
Sakkutuujusimasoq immikkut sungiusarsimasoq B.S. Christiansen Naalakkersuisut isumassarsiuisussatut ineriartortitsisussatullu sulisussarsiarigaat, Atuagagdliutini ippassaq saqqummersuni allaaserineqarpoq.
Allattoq Inge S. Rasmussen
oktobarip 01-at 2015 06:45
Nutserisoq Erna Lynge
Namminersorlutik Oqartussani Naalakkersuisut siulittaasuata naalakkersuisoqarfia taama aaqqissuussisuusoq, aviisimi allaaserinnipput.
Naalakkersuisoqarfimmili pisortap Søren Hald Møllerip tamatumunnga suut tunuliaqutaanersut aamma sakkutuujusimasup immikkut sungiusarsimasup sorpiaat suliariniarnerai Atuagagdliutinut itisilerusunngilai. Soorlu B. S. Christiansenip Naalakkersuisut qanoq ikiorniarnerai aamma nassuiarusunngikkaa.
Sakkutuujusimasoq immikkut sungiusarsimasoq Tour de Francemi Bjarne Riisimik sungiusaasimasutut ilisimaneqarpoq. Aamma tv-mi aallakaatitassiaasimasuni arlalinni peqataasarsimavoq, tv-liortunilu Bubberimi sakkutuutut sungiusaasimalluni.
