Sakkutooq aallartoorfigitilluni toqusoq
Danskeq sakkutooq 21-nik ukiulik Afghanistanimi qallunaat sakkutooqarfianni Camp Bastionimi aallartoorfigitinnermi kinguneranik ippassaq toquvoq.
Allattoq Louise M. Kleemann
februaarip 25-at 2008 08:23
Ajutoorneq pivoq sakkutooqarfiup avatinnguani Camp Bastionimi sakkutuut taartumi periusissaminnik sungiusarniarlutik piareersaleruttorneranni.
Sakkutooq nakorsamit pilertortumik ikiorserneqaraluarluni annaanneqarsinnaasimanngilaq.
Ajutoornerup nalaani qanorpiaq pisoqarnersoq massakkut ilisimaneqanngilaq, piffissamili aggersumi sakkutuut paasiniaasartuinit immikkullu ilisimasalinnit misissoqqissaarneqassaaq. Misissuinermi ilanngullugu paasiniarneqassaaq periaatsinik allanngortitsisoqassanersoq, taamaalilluni ajutoornerit taamaattut siunissami pinngitsoorneqarsinnaaniassammata. Taamaalilluni Afghanistanimi danskit 2002-mi sakkutooqartitsilermatali manna tikillugu sakkutuut aqqanillit inuunerannik akeqareerpoq.
