Sakkunik Zimbabweliaassisoq alaatsinaanneqarlualerpoq
Umiarsuup usii tassa sakkut assigiinngitsut imassaat qaartartullu igeriuttakkat Kinameersut Zimbabwemukaanniakkat.
Zimbabwemi præsidentip sakkutuuisa upalungaarsimatitat sakkut piniarsimavaat sapaatillu akunnerata kingulliulli ingerlanerani apuutereersimasussaangaluarlutik. Zimbabweli toqqaannartumik immamut atanngilaq. Piffissami kingullermi Mugabep qinersinerup inernera nalunaarutiginaveersaarmagu aattaqaqisumik perulluliortoqaqattaarmat, Afrikap kujasinnerusortaani naalagaaffinni sulisartut kattuffii naalakkersuisuilu assigiinngitsutigut iliuuseqarnialerput. Afrikami Kujallermi assartuinermik suliallit kattuffiata umiarsuaq tallimanngormat taqqavunga apuummat usingiarumanngilaat, eqqartuussiviillu nunakkut sakkunik Zimbabweliaassiniarnerit tamarmik inatsisinik unioqqutitsinertut isigissallugit nalunaarlutik. Tamatuma kingorna umiarsuaq Mosambique-mut tulannialersaaleraluarmat pisortat akuersissummik tuniserusunngillat. Angolap præsidentia Mugabemik tapersersuisutoqqatut naluneqanngikaluartoq, Angolami talittarfiit qullersaqarfiannit nalunaarutigineqarpoq talittarfiit tamarmik piumaffigineqartut umiarsuaq tamaannga talitinneqassanngitsoq.