Amerikamiut sakkutuui Irakimiittut pikitsitsinianut nutaarluinnarmik iliuuseqartalersimapput.
Tassa pikitsitsinianut Sunni-muslimiusunut sakkunik tunioraasalersimapput, Amerikamiunut saassussiniat taamaalillutik Sunni-musliminit unitsinneqartalerniassammata – aamma peqqarniisaarniaqatigiit Al Qaeda-kkut akiorsinnaaniassammatigik.
Irakimi nakuuserneq unitsinniarlugu neriuutaarulluinnarnermi iliuutsitut kingullertut isigineqarsinnaavoq.
Akeqqat ajugaaffigisinnaanngikkaanni suleqatiginiartariaqarput, akeqqat allat akiorsinnaajumallugit.
Sakkutuut aviisimut New York Times-imut oqaatigaat periaatsiminni nutaami uissuumminartumik iluatsitsilluarlutik.
Periaasertik nutaaq Irakip kippasissortaani qiterpasissortaanilu Sunni-muslimit pikitsitsiniat amerlanerpaaffigisaanni misilerarsimavaat.
Sunni-muslimit pikitsitsiniat sakkunik, patroninik, orsussanik aningaasanillu akilerneqarlutik Amerikamiunut saassussinianik unitsitsisarniarlutik neriorsuisimapput ataasiarlutillu aqqusernup sinaani qaartartunut mianersoqqusisimallutik kiisalu Al-Qaeda akiuunniarlutik neriorsuutigisimavaat. Irakillu kiterpasinnerusortaani peqqarniisaarniarneq minnerulersimavoq.
Taamaattorli Sunni-muslimit Amerikamiut tungujortunik iseqarnerat piinnarlugu ikiuutinngillat.
Sunni-muslimit Amerikamiut Irakimiinnerat akerleriuarsinnarpaat, taakkua Amerikamiunut oqarput:
- Nunatsinnik tiguaasimagassi qinngaraassi, kisianni Al-Qaeda qinngarineruarput qinngarinerpaasavullu tassaapput Shia-muslimit.
Isornartorsiuisut oqarput Amerikamiut periaaseriligaat navianartuusoq, tassami Amerikamiut sakkunik agguaanermikkut Irakimiut illuatungeriit imminnut sorsuunnissaannut sakkulersuisunngorsinnaammata. Tassami Irakimi politiit sakkutuullu amerlanerit Shia-muslimiummata.