Sakkortuumik anoraasuaneratigut timmisartoq ajutoorpoq

Air Icelandip timmisartuutaa DASH 8, Reykjavikimeerluni anorsarisseruttortoq nunnilerluni mittarfimmiit sisoorpoq.

Timmisartoq innaarsuup saanut unippoq, sulumilu aappaatigut ajoqusilaarsimalluni.

Issimasut 34-t tamarmik ajunngillat. Ilaasut 31-t timmisartullu inuttai pingasut mittarfikkoorlutik Mittarfeqarfiup illutaanut namminneerlutik pisussinnaasimapput, tassanilu ajornartoornermi ikiorserneqarnissamik neqeroorfigineqarlutik.

Tassanngaannartumik anoraasuanerata, Air Icelandip DASH 8-utaata assakaasui mittarfimmut tunngajunnaarsippai, politikommissær Niels Nyvang Nuummi politiineersoq oqarpoq, taassumalu ajutoornermut teknikkikkut ajornartorsiuteqarneq peqqutaannginnerarpaa.

- Timmisartup milernerani tassanngaannartumik anoraasuariataarpoq, timmisartup assakaasuata aappaa miffissap avataanut pitillugu, Niels Nyvang oqaluttuarpoq. Taassumali aamma oqaatigaa, miffissaq piffissami ajutoorfimmi quasarsimanngitsoq.

Mittarfiup nalaani anorsarissimavoq, kisianni politiit paasisaat naapertorlugit minnissap unitsikkallarnissaaanut pissutissaqarsimanngilaq.

Mittarfeqarfinniit oqaaseqartitsisinnaasimangilagut, tassanngaanniili politiinut innersuussipput.